LEGAZPI CITY-Suminakat na sa P18.49 trilyon an kabilugang utang kan gobierno kan Pilipinas sa pagtatapos kan bulan nin Marso 2026, susog sa Bureau of the Treasury (BTr).
Naglangkaw ini nin P328.43 bilyon o 1.81% poon sa P18.16 trilyon kan Pebrero, asin mas halangkaw ini nin P1.81 trilyon o 10.81% kumparar sa P16.68 trilyon kan parehong bulan kan nakaaging taon.
Segun sa ahensya, mayormenteng huli sa pagluya kan piso kontra sa dolyar an paglangkaw na ini, na nakadagdag nin haros P299.5 bilyones sa kantidad kan foreign currency-denominated debt, apwera pa sa net issuance kan government securities.
Sa kabilugang utang, 67.8% o P12.53 trilyon an hale sa domestic debt, mantang 32.2% o P5.95 trilyon an hale sa external debt.
An domestic debt naglangkaw nin 0.44% huli sa net issuance na P46.72 billion, mantang an external debt naglangkaw nin 4.81% huli sa epekto kan depreciation kan peso.
An piso nagsarado sa P60.748 kada dolyar kan Marso 31, mas maluya kumparar sa P57.665 kan Pebrero 27 kaya naglangkaw an gastos sa dolyar-denominated debt.
Mientrastanto, uminabot sa P381.41 bilyon an garantisadong obligasyon kan gobyerno, na bahagyang naglangkaw huli sa epekto kan depreciation kan peso sa external guarantees.
Basado sa Budget of Expenditures and Sources of Financing 2026, piglalaoman na maabot sa P19.06 trilyon an utang kan nasyon sa katapusan kan taon.
Sa irarom kan Medium-Term Fiscal Framework 2022–2030, target kan gobyerno na ibaba an debt-to-GDP ratio sa 58% sa 2030, gikan sa presenteng 63.2%, na iyo an pinakahalangkaw sa laog nin duwang dekada.
