Padagos na mahalangkaw an utang kan Pilipinas, na piglalaomang maabot sa P19 trilyon pag-abot kan 2026, susog sa budget documents.
An piglalaomang kantidad nin utang an mas halangkaw nin haros P2 trilyon kumpara sa 2025.
Kan Hunyo, nag-abot na sa P17.267 trilyon an utang kan gobyerno, naghalangkaw nin 11% gikan sa P15.483 trilyon kan nakaaging taon.
Kadaklan kan utang sa 2026 an manggigikan sa laog kan nacion (P13.28 trilyon), mantang P5.78 trilyon man an kukuwaon gikan sa luwas.
Piglalaoman mang maabot sa P2.682 trilyon an gross borrowings kan gobierno, kun saen P2.055 trilyon an manggigikan sa laog kan nacion asin P627.104 bilyon gikan sa luwas.
Mantang naghahalangkaw an utang, obheto ni Finance Secretary Ralph Recto na mapababa an debt-to-GDP ratio sa irarom kan 60% pag-abot kan 2028, huring taon kan pagmamanehar ni Presidente Ferdinand Marcos Jr., na masiertong mababayadan kan nacion an mga utang nin warang negatibong epekto sa ekonomiya.
Segun ki Presidente Marcos, piglalaomang makakatipon nin haros P5 trilyong buwis sa 2026, asin isesentro man giraray an paggastos sa social asin economic services.
