Nagkaroon nin tsana sinda US President Donald Trump asin Ukrainian President Volodymyr Zelensky na makapag olay sa antes an funeral mass para kay Pope Francis.
Ipigkondusir an nasabing pag-oolay sa laog kan St. Peter’s Basilica.
Segun ki Zelensky na kaibanan sa saindang mga natukar an pagprotehir sa buhay kan mga namamanwaan, pagkakaigwa nin tigil putukan, siring man an paghaluyan na katrangkiluhan.
Segun man sa White House spokesman na kaibanan ni Trump na naghilingan nin pribado an duwang lider asin nagkaigwa nin produktibong pag-oolay na nagdura nin 15 minutos.
Nagkasundo man an duwa na ipagpadagos an pag-oolay na may kinaaraman sa giyera sa Ukraine.
Ini an enot na paghihilingan ninda Trump asin Zelensky makalihis an mainit na pagsisimbagan ninda sa White House kan Pebrero.
