Pinagtibay kan Estados Unidos an saindang “ironclad” o matatag na mutual defense commitment sa Pilipinas kasabay kan pagselebrar kan nacion sa ika-128 anibersaryo kan Araw ng Kalayaan kan Hunyo 12.
Sa sarong mensahe hale sa US Department of State, ipinaabot ni US Secretary of State Marco Rubio ang mainit na pagbati sa mga Pilipino sa ngaran kan bilog na gobierno kan Amerika.
Tinawan-doon niya an hararom na alyansa kan duwang nacion na nagpuon pa sa kooperasyon kan Ikalawang Digmaang Pandaigdig asin namantinir sa paagi kan pirang dekada nin diplomatikong relasyon.
Huli kaini nakatalaan man na iselebrar kan duwang nacion an saindang ika-80 taon kan diplomatic relations, afuera pa sa ika-75 anibersaryo kan 1951 Mutual Defense Treaty na tinawan-doon man ni Rubio.
Nagtitinir man na committed ang Amerika kaiba an Pilipinas, na tumatayong Chair kan ASEAN ngunyan na taon, bilang sarong amigo, partner asin allies sa pagmamantinir kan sarong bukas asin malayang Indo-Pacific Region.
Binanggit man ni Rubio ang pagpapararom kan economic partnership kan US asin Pilipinas sa paagi kan Luzon Economic Corridor asin an pagbilog nin salbado asin matatag na supply chain para sa mga kritikal na mineral
Itinampok man kan kalihim an matatag na relasyon kan mga namamanwaan kan duwang nacion kun sain labi sa apat na milyong Filipino-American an presenteng nag-iistar sa US, mantang labi sa 750,000 Amerikano man an namamalagi sa Pilipinas.
Sa huri, naghihingoa an opisyal kan US na mas mapapahewas pa an kooperasyon kan duwang nacion nganing ibusol an kapayapaan, seguridad, asin kauswagan sa mga masunod na taon.
