Parehong buminagsak sa katubigan kan South China Sea sa magkasuway na insidente an sarong US Navy helicopter asin fighter jet kan nakaaging aldaw Oktubre 26.
Sa sarong statement na iniluwas kan US Pacific Fleet ngonian na Lunes, Oktubre 27, an enot na crash incident an imbwelto an sarong US Navy MH-60R Sea Hawk helicopter, na nakadesignar sa “Battle Cats” kan Helicopter Maritime Strike Squadron 73.
Buminagsak an nasabing helicopter sa disputed waters mantang nagsasagibo nin routine operations hale sa aircraft carrier na USS Nimitz.
Ligtas mang narekober kan search and rescue assets hale sa Carrier Strike Group an gabos na tulong crew members.
Kasunod kan insidente, nasa 30 minuto an nakakalihis, buminagsak man sa disputed waters an F/A 18F Super Hornet fighter na nakadesignar sa Fighting Redcocks kan Strike Fighter Squadron 22 habang nagsasagibo man nin routine operations hale sa Nimitz.
Matrayumpo mang nakuwa an crew members asin ligtas na narekober kan search and rescue assets hale sa Carrier Strike Group 11.
Gabos na personnel na imbwelto sa nasabing mga insidente an ligtas asin nasa maray nang kondisyon.
Presente pang iniimbestigaran an rason kan pagbagsak kan US Navy helicopter asin fighter jet.
