LEGAZPI CITY- Target kan US Coast Guard na mapalangkaw pa nin 30% an kapasidad kan local disaster responders sa Legazpi City sa search and rescue.
Ini an katakod kan isasagibong mga aktibidad kan pwersa kan Estados Unidos na presenteng nasa ciudad bilang parte kan Pacific partnership 2024.
Segun ki Lt. Flor Joseph kan US Coast Guard na nakikipag koordinar sinda sa Legazpi City Disaster Risk Reduction and Management Office ngani na magkaigwa nin ribayan nin ideya an duwang lado para sa pag-aram sa best practices pag-abot sa pagresponde sa emerhensya.
Napag-araman na igwang nagkapirang mga trained personnel na hali sa Bureau of Fire Protection an matutok sa isasagibong mga aktibidad na may kinaaraman sa rescue operations.
Dugang pa kaini na igwa man nin mga pighandang ekipahe para sa mga nakalinyadang mga aktibidad.
Mientras tanto, dugang pa ni Joseph na saro sa mga napag-olayan ninda kan lokal na gobierno kan Legazpi iyo an pagtataong atensyaon sa tsunami plan.
