Naghale an negotiating team kan Estados Unidos sa Islamabad na dai nakabilog nin sarong kasunduan makalihis an 21 oras na pakikipag-olay sa Iran.
Segun ki US Vice President JD Vance, dai inako kan Iran an mga kondisyon kan Estados Unidos, kabali an pagpundo kan produksyon nin nuclear weapons.
Huli kaini, dai nakaabot sa kasunduan an duwang lado.
Sa lado kan Iran, sinabi kan saindang gobyerno na natapos na an orolay asin mapalitan muna nin mga dokumento an mga eksperto gikan sa mag-inibong na lado, mantang piglalaoman an mga negosasyon na magpapadagos sa ibong kan igwa pang mga natatadang dai pagkakasinabotan.
Nagtetenir na sentro kan diskusyon an Strait of Hormuz, na importanteng marhay sa pankinaban na komersyo nin langis.
Nagpapadagos an mga tensyon sa pagkontrol kan lugar, mga bayad danyos sa gera, asin nuclear program kan Iran.
Sa ibong kan orolay, nagtetenir na halangkaw an kawaran nin tiwala sa pagultanan kan duwang nasyon, mantang padagos an epekto kan iriwal sa rehiyon, kabali na an paglangkaw kan presyo kan krudo asin danyos sa imprastraktura.
