LEGAZPI CITY- Paramientras na ipinasarado an kakabukas pa sanang slaughterhouse sa Buhi sa provincia kan Camarines Sur makalihis na magpositibo sa African Swine Fever an sarong kinatay na urig sa lugar.
Segun ki National Meat Inspection Service Bicol Director Dr. Alex Templonuevo sa intrevista kan Bombo Radyo Legazpi na narisa kan mga meat inspectors na igwang kakaiba sa sublit kan nasabing urig hasta sa makumpirmar an helang.
Huli digdi, isasairarom sa limang aldaw na quarantine an nasabing slaughterhouse ngani na matawan dalan an disinfection asin paglilinig sa lugar.
Sa presente maghahanap muna nin lugar na paramientras na gagamiton bilang katayan kan mga urig sa nasabing banwaan.
Segun ki Templobuevo na importante na nasasara kan mga meat inspectors an mga urig na may helang ngani na masierto na salbado an mga karne na pigpapabakal sa merkado.
