LEGAZPI CITY- Labi an pagmundo ngunyan kan pamilya kan lalaking binadil sa sarong baraylihan sa Sitio Pangyawan Barangay Taysan, Legazpi City.
Napag-araman na anom na aki an nawalat ni Maximo Talde Jr., 42-anyos na residente kan nasambitan na lugar.
Magigirumduman na binadil ini kan dae pa nabibistong suspetsado sa tahaw kan pabayli sa lugar.
Sigon ki Taysan Barangay Captain Renato Valladolid, drug surrenderee an biktima sa irarom kan Oplan Tokhang.
Dati suboot ining namamasada nin tricycle sagkod sa nagin mason na iyo an saiyang trabaho antes an nangyaring krimen.
Namumundo man si Valladolid huli ta dating maogma asin salbado an pabayli sa Sitio Pangyawan kun kaya dae piglalaoman na mangyayari an siring na insidente.
Sa ngunyan, nagpapadagos pa an imbestigasyon kan mga otoridad katakod kan nangyaring pambabadil kun sain maski sa kadakolan kan tawong nasa kaogmahan, wara nin nakabisto sa gunman.
