LEGAZPI CITY- Ipigsairarom sa paraffin examination asin otopsiya an bangkay kan parehong suspek asin biktima sa nangyaring pananaksak asin pambabadil sa Purok 7 Brgy. Inamnam Pequeño, banwaan kan Guinobatan.
Biktima sa insidente an retiradog soldado na si Apollo Pallan mantang suspek an public school teacher na si Reynato Nares.
Sigon ki PCI Cecilia Zuñiga, hepe kan Guinobatan Municipal Police Station, ipigsagibo an nasambitan na eksaminasyon sa duwang bangkay huli ta dae sindang narekober na badil asin basyo nin bala sa crime na ikinagadan kan suspek.
Alagad base sa inisyal na resulta kaini, nagpositibo suboot sa gun powder an hawak ni Nares .
Dugang pa kan hepe, pina-check na ninda kun gun holder si Pallan na nagpositibo man na igwa nin pagsadiring calibre 45 na hudyan na nagparehistro kan taon 2011.
Duda ni Zuñiga, igwa nin nagtago kan badil na ginamit sa insidente siring na kan mga basyo nin bala.
Magigirumduman na base sa enot na imbestigasyon kan pulisya, dagit an motibo kan paratukdo sa pananaksak sa dating soldado huli sa pagtuyaw kaini dapit sa mga nahihiling na kaduda-dudang indibidwal na luwas laog sa harong ni Nares na nagin subject kan Oplan Tokhang.
Sa ngunyan, padagos an imbestigasyon kan Guinobatan MPS dapit sa insidente mantang pighahalat an pinal na resulta kan eksaminasyon.
