LEGAZPI CITY- Liwat na ipigpundo kan National Food Authority (NFA) Bicol an unloading kan rinibong sako nin bagas hale sa duwang barkong nakadaong sa Tabaco City port kan Albay katakod kan bagyong Ompong.
Sa intrevista kan Bombo Radyo Legazpi ki NFA Bicol Director Henry Tristeza, paramientras munang ipigtago o nagsafety dock an duwang barko sa Sula Channel kan Bacacay tangarig na maibitaran an mga dae piglalaoman na pangyayari siring kan pagkadumog kan mga bagas o pagkaraot kan mga barko.
Napag-araman na nasa poco mas o menos 80, 000 rice bags pa an nakakarga sa MV Blue Emperor mantang dae pa man pighihiro an 164, 000 na sako kan bagas sa MV Bravo na nag-abot kaitong Agosto 25.
Inabisuhan man an kapitan kan barkong MV Unison na madara kuta kan nasa 236, 000 bags para sa alokasyon ngonian na Setyembre na magtake shelter muna.
Sa ibong na lado, inasegurar ni Tristeza na bastante pa man an suplay nin bagas sa bilog na Bicol huli ta properly positioned na man an nasa 85, 500 rice bags mantang nagkapirang banwaan na man an nagrequest sa dugang na alokasyon.
Katakod man kan piglalaoman na amay na anihan huli sa huma kan danyos sa sektor kan agrikultura, bukas man an ahensya sa pagbakal kan mga produkto sa P17 per kilo.
Segun ki Tristeza, posible kayang magbagsak an buying price kan traders en caso dakol an ani kan mga paraoma.
