LEGAZPI CITY – Nagpaluwas na an Philippine Overseas Employment Administration (POEA) nin guidelines sa standard boarder katakod kan partial deployment ban na ipinaotob sa Kuwait.
Laog sa nasabing ban an mga newly-hired OFW na pasiring sa nasabing Middle East country.
Sa intrevista kan Bombo Radyo Legazpi ki OWWA Bicol Communications Officer Rowena Alzaga, dae man apektado kaini an mga dati nang obrero asin laom sana kan nasabing pagbabawal an maprotehiran an mga domestic wokers.
Mientras tanto, hinale kan OWWA an paghadit an mga kahimanwa sa naglalalang tension sa Middle East sa pagultanan kan Iran asin Estados Unidos.
Aminado si Alzaga na warang labor agreement an Pilipinas sa Iran asin Iraq kaya kadaklan sa mga Pilipino na yaon sa lugar an mga bako dokumentado.
Sa ibong kaini, preparado man na magtabang an OWWA sa anuman na dae piglalaomang insedente asin makikipagcoordinar na sa mga lakdang na kaipuhang gibuhon.
Inasegurar man kan ahensya an social benefit na mareresibe kan pamilya kan OFW en caso ipagsugo kan gobierno kan Pilipinas an repatriation kan mga kahimanwa.
