LEGAZPI CITY – Ikinaugma ni Catanduanes Governor Patrick Azanza an pagkakaresibi niya nin passing mark hale sa saiyang nasasakupan sa saiyang State of the Province Address.
Segun saiya sa intrevista kan Bombo Radyo Legazpi na maski papano an nagigibo niya an mga bagay na ipigpromesa niya sa mga catanduanon kan nangangampanya pa sana siya arug kan halangkaw na presyo kan gasolina, kuryente, asin an pagpapahalangkaw sa presyo kan abaca na nagigin pabor sa mga abacaleros.
Nagpapadagos man suboot an saindang koordinasyon sa mga ahensya kan gobierno arug kan Department of Labor and Employment, Department of Trade and Industry, asin Technical Education and Skills Development Authority para sa pagtatao nin tabang sa mga pamilya kan mga abacaleros.
Masasabi niya na sa laog kan 100 days na saiyang panenerbihan sa posisyon an masasabi niyang nagkaigwa nin pagbabago an saindang provincia huli sa mga grado na naresibi niya hale sa saiyang mga residentes.
Pigsyerto man kan opisyal na magpapadagos an saindang programa na makakatabang sa mga nagtitios na sector na warang boses sa sociodad nganing matawan ini nin atensyon hale sa gobierno.
Nagpasalamat man siya sa mga opisyales kan kada munisipalidad kan provincia, mga secotral representatives asin sa mga ordinaryong namamanwaan na nakisumaro nganing madangog an saiyang “ulat sa bayan”.
Mientrastanto, puga-puga na man an saindang preparasyon para sa nagdadangadang na pag-obserbar kan undas asin nagmamawot sinda na magigin matuninong ini ngonian na taon.
