LEGAZPI CITY — Padagos an pangapudan kan Presidential Task Force on Media Security (PTFOMS) sa kooperasyon sa paglaban sa problema sa media killings sa nacion kun sain pinakahuri digdi an panggagadan ki Albay-based radio broadcaster Joey Llana.
Segun ki PTFOMS Executive Director Usec. Joel Sy-Egco, habo na kaining madugangan pa an media killings kun kaya piggigibo an gabos na esfuersos sa pag-aram kan mayor na rason kan problema.
Kaipuhan kaya na matumbok an ugat kan problema siring kan pulitika, korapsyon o anumang bagay ngani na mawara an problema sa maabot na panahon.
Tinawang-duon pa ni Egco na pigtatawanang-importansya an buhay kan tawo maski ano pa man na klase nin tawo, maraot o bako asin dae maja-justify an paggadan.
Liwat man na nagpagirumdom an opisyal na en kasong may nareresibe ng death threats, tulos na maghagad nin tabang sa mga otoridad ngani na mapreventaran an anumang posibleng mangyari.
Mientras tanto, naglalaom man si Egco na magkakaigwa na nin breakthrough an kaso kan paggadan ki Llana.
