LEGAZPI CITY- Pormal nang ipighayag sa media an final list kan mga kaabang-abang na events sa pagbubukas kan Ibalong Festival 2017 sa masunod na semana, Agosto 11.
Sa intrevista kan Bombo Radyo Legazpi ki Mayor Noel Rosal, dakol suboot an mga nakalinyadang first time events na isasagibo sa kapiestahan siring na sana kan mixed martial arts, skate and BMX competitions, car shows asin iba pang side events.
Ibinuyagyag pa ni Rosal na maatendir man bilang huespe de honor an Filipino-American mixed martial artist na si Brandon Vera tangarig na personal na mahiling an tibay asin kusog kan mga ‘oragon’ na Bicolano sa nasabing sport sa Agosto 12.
Afuera pa digdi, piglalaoman na man an bulos kan mga turista sa isasagibong street dance presentation, dance of the Ibalong heroes na sinda Handiong, Bantong asin Baltog, weekend market, Mutya ng Ibalong 2017 siring man an Asian Cup Mt. Mayon Triathlon na papartisiparan kan mga atleta hale sa manlaen-laen na nacion sa Asia.
Inasegurar ni Rosal na makolor an magigin pagbubukas kan Ibalong Festival na idineklarar man kan city government bilang special holiday. Pagbibida pa kan alkalde na ‘worthy of investment’ an mga nakalinyadang aktibidades urog na kakabit kaini an pagpapahiling kan pagigin tunay na Bicolano.
