LEGAZPI CITY—Nakapagrehistro an School Division Office (SDO) Albay nin maabot sa 60% na turn out kan mga estudyante sa pagbabalik eskwela pagkatapos kan holiday season.
Segun ki Froilan Tena, an tagapagtaram kan SDO Albay sa intrevista kan Bombo Radyo Legazpi, na susog sa pakikipag-olay ninda sa mga paratukdo na an rason—kadaklan sa mga absent nasa ibang lugar pa asin nagbabakasyon pa.
Piglalaoman na sa Lunes, Enero 6, mapadagos na an pagklase asin pinaglalaoman man na an gabos na estudyante maklase na—na kun saen dakol na an nakalinyang mga aktibidades sa division hanggang regional education.
Dugang kan opisyal na dakol na pighahabol an ahensya huli ta base sa kalendaryo kan DepEd Central Office an huring aldaw kan klase iyo sa Abril 15, 2025.
Igwa man nin probisyon sa bagong revised guidelines mapadapit sa class suspensions an DepEd order 22 Series of 2024 kun saen an eskwelehan o paratukdo pwedeng magkundusir nin make-up classes.
En kaso man na magkundusir nin make-up classes kaipuhan na magpaisi sa division office para aram kan ahensya na sinda makundusir nin sarong make-up class.
Mientrastanto, nagpasalamat man an opisyal sa mga paratukdo asin magurang na pig-engganyar an saindang mga kaakian para maglaog sa eskwelahan.
Siring man an paglaom na wara nang mag-abot nin raot na panahon para maipadagos na an pagklase kan mga estudyante.
