LEGAZPI CITY – Nabukag an tupada sa Barangay Salugan Camalig, Albay makalihis na mag-abot an pulisya.
Base sa report gikan sa Camalig Municipal Police, sarong concerned citizen an nagpaabot sa saindang istasyon dapit sa nangyayaring tupada sa lugar.
Tulos man na nagpasiring an mga tauhan kaini sa pangengenotan ni PO3 Buenaobra.
Alagad pag-abot kan mga otoridad, nagdurulagan pasiring sa kanya-kanyang direksyon an mga parataya kan manotisyaran an papaabot na mga pulis.
Solamenteng limang pambulang na manok na sana an narekober asin duwang pades nin tsinelas.
Dae man nabisto an nasambitan na mga para-tupada.
