LEGAZPI CITY—Pighayag kan Philippine Fiber Industry Development Authority (PhilFIDA) Catanduanes na sarong magayon na lakdang kun ipapaotob na taon-taon an pag-implementar kan Tulong Panghanapbuhay sa Ating Disadvantaged/Displaced Workers o TUPAD para sa mga abaca farmers magin sa mga parasisira sa isla provincia.
Ini an kasunod kan pigbubusol ni Acting Provincial Board Member Adrian B. Torcelino asin iba pang ahensya kan lokal na gobierno na pwedesir pagkakitaan kan mga benepisyaryo an paglinig, pagtatanom kan mga abaca sa irarom kan TUPAD.
Segun ki PhilFIDA Catanduanes Provincial Fiber Officer Bert Lusuegro, sa intrevista kan Bombo Radyo Legazpi, makakatabang ini sa mga abaca farmers huli sa may makakadugang ini nin ganasya sainda.
Siring man na may dugang sindang aanihon kun target na magtanom kan mga abacaleros nin nagkapirang pidaso nin abaca kada taon.
Tinawan-doon man kan opisyal na dae pa sierto kun gabos na abacaleros an makakabale sa nasabing programa huli sa may guidelines asin criteria mapadapit digdi an Department of Labor and Employment (DOLE).
Mientrastanto, sinabi man ni Lusuegro na medyo mababa sa ngunyan an produksyon kan abaca huli kan mga nakalihis na bagyo na nangrapado sa naunambitang provincia.
