LEGAZPI CITY- Nahahampang ngunyan sa kasong pagbalgar sa Cockfighting Law an tulong katawo makalihis na madakop sa isinagibong anti-illegal gambling operations kan mga otoridad sa Barangay Guinbanwahan Balud, Masbate.
Binisto kan Balud Municipal Police an mga naarestar na persona na sinda Ramon Banate, 60-anyos; Milo Bunio, 28; asin Daniel Pancho, 59-anyos na gabos mga residente kan nasambitan na banwaan.
Base sa report gikan sa pulisya, nagsagibo sinda nin operasyon sa pangengenotan ni PO2 Melmar Rapsing kun sain naaktuhan an mga suspetsado na nagsasagibo nin iligal na tupada.
Dakol pa an suspek na imbwelto sa aktibidad alagad nagdulag an mga ini pasiring sa iba-ibang direksyon makalihis na manotaran an presensya kan mga pulis.
Narekober sa lugar an duwang pangbulang na manok asin sarong pidaso nin steel spur.
Mientrastanto, binitbit an mga naarestar na suspek pasiring sa Balud MPS ngani na sangatan nin magkakanigong kaso sa Provincial Prosecutor’s Office.
