LEGAZPI CITY—Arestado an tulong lalaki sa sarong entrapment operation kan pinagsarong operatiba kan Matnog Municipal Police Station, Provincial Intelligence Unit, asin Sorsogon Police Provincial Office sa Barangay Pawa, Matnog, Sorsogon.
Naarestar an nasambitang mga suspetsado huli sa ilegal na pwersahang pagkolekta nin P20.00 sa mga biyaherong pasiring sa Visayas asin Mindanao.
An mga suspetsado may mga edad na 21-anyos, 47-anyos, asin 19-anyos; pararehong residentes kan Barangay Caloocan, Matnog, Sorsogon.
Nahiling an mga suspetsado sa aktong ilegal na pagkolekta nin P20.00 gikan sa nagpanggap na pasahero na malaog sa pantalan kan Matnog port; afuera sa pagbabayad nin legal na P40.00, an pagkolekta nin P20.00 an dugang na pasanon kan mga biyahero na warang paaram sa mga biktima kun saen pigkonsiderar ining swindling (estafa) o pandadaya.
Susog sa nagreklamo, haloy na ining modus operandi kan mga suspetsado alagad warang may kusog na boot na magreklamo maski an mga bus operator huli ta habo kan mga ini na maistorbo an saindang mga biyahe.
Napag-araman na haros uro-aldaw ining piggigibo kan mga suspetsado na manloko nin mga pasahero.
Sa presente, an mga suspetsado yaon na sa kustodiya kan Matnog MPS para sa magkakanigong legal na proseso.
