LEGAZPI CITY – “Answered prayer” kun ikonsiderar kan Rank 2 sa katatapos pa sanang September 2019 Electrical Engineer Licensure Examination an nakuang trayumpo.
Pagheheras ni Gerald Mier, Cum Laude graduate kan Bicol University sa ekslusibong intrevista kan Bombo Radyo Legazpi, napahibi suboot an bilog na pamilya sa labing kaogmahan kan maaraman an resulta kasubanggi.
Makapasa sana suboot sa exam an ipinangadyi sa Kagurangnan kaya labing pagkabigla asin pasasalamat sa bonus na pagsakat sa ikaduwang pinakahalangkaw na pwesto kan passers sa 92.05 exam rating.
Aki pa sana, mahilig na si Mier sa pagkalikot kan mga electrical equipment asin installation kan kuryente huli sa amang electrician mantang manikurista man an ina.
Nguhod si Mier sa anom na magturugang asin solong lalaki segun sa matuang tugang kaini na dati man na Bombo Radyo anchorman na si April ‘Abrilata’ Mier.
Aminado man ini sa dakulang pressure sa pagkua kan board exam urog pang bisto an pighaliang unibersidad sa pag-produce nin mga topnotchers sa board exams, mantang scholar man ini kan Department of Science and Technology (DOST).
Sa anunsyo kan Professional Regulation Commission (PRC), 3,285 sa maabot sa 5, 000 na nagkuwa kan exam an puminasar bilang Registered Electrical Engineers.
