LEGAZPI CITY — Gadan an sarong drug personality makalihis na mauli sa shootout an isinagibong drug buy bust operation kan Philipines National Police sa banwaan kan Daraga, Albay.
Binisto an suspek na si alyas ‘Jake Saro’ na tubong Marawi City asin ngunyan nagtetenir sa Barangay Oro Site sa ciudad kan Legazpi.
Isinagibo kan Intel Operatives kan Daraga Municipal Police an operasyon sa pamamayo ni PS/Insp. Richelle Balute sa First Park Subdivision, Barangay Sagpon kun saen nangyari an transaksyon nin iligal na droga.
Napag-araman na natanugan kan suspek na sarong pulis an saiyang katransaksyon kun kaya binalo kaining manlaban ngane makadulag.
Nagkaigwa nin ribayan nin putok sa pagultanan kan suspek asin mga pulis na nagresulta sa pagkakabadil kay Jake.
Nagibo pa ining maidalagan sa ospital alagad binawian man nin buhay.
Nakikipagtabangan man ngunyan an Daraga Municipal Police sa Legazpi City Police ngane maaraman kun kasabay an suspek sa drug watchlist o sarong drug surrenderer.
Narekober sa pinangyarihan kan insidente an sarong sachet na laog an pigtutubudang shabu asin buy bust money.
