LEGAZPI CITY-Itinaas kan US Tsunami Warning System ngonian na aldaw nin Miyerkules (Martes sa Amerika) an peligro kan posibleng tsunami makalihis an sarong makusog na linog, na igwang magnitude 8.6 sa Kamchatka Peninsula sa Russia.
Segun sa US Geological Survey (USGS), nairehistro an linog sa rarom na 19.3 km o 12 miles asin tuminama sa 125 kilometro sa sirangan kan Petropavlovsk-Kamchatsky, sarong baybayon sa ciudad sa Far Eastern Russia.
Piglalaoman kan mga eksperto na maaabot kan mga alon an nagkapirang parte kan mga baybayon kan Russia asin Japan sa laog nin 3 oras matapos an linog.
Sa Japan, nagpaluwas na nin tsunami advisory para sa sirangang parte kan Hokkaido hasta Wakayama, kung saen posibleng magabott sa 1 hasta 3 metro an langkaw kan alon.
Nagbilog na man nin task force an gobierno kan Japan para sa monitoring asin posibleng tulos na aksyon.
Nagpaluwas man nin tsunami watch an mga otoridad para sa isla kan Hawaii (US), Guam asin mga isla sa Micronesia kairiba man an mga baybayon kan US West Coast (California, Oregon, at Washington), Aleutian Islands asin dakulang parte kan Alaska.
Mantang sa Russia, nairehistro an 3 hasta 4 metrong langkaw kan tsunami n alaoman sa nagkapirang parte kan Kamchatka.
Segun man sa Kamchatka Governor na si Vladimir Solodov, ini na an pinakamakusog na linog na nairehistro sa rehiyon sa laog kan pirang dekada.
