Inanunsyar ni US President Donald Trump an pagbilog nin “Board of Peace” para sa Gaza, na an katuyuhan iyo an bantayan an paramientras na liderato asin rekonstruksyon kan mga naraot na lugar makalihis an gera sa pagultangan kan Israel asin Hamas.
Kabali sa mga founding members kaini iyo sinda US Secretary of State Marco Rubio asin an dating Punong Ministro kan UK na si Sir Tony Blair.
Kabali man sa executive board sinda Middle East envoy Steve Witkoff, Jared Kushner, World Bank President Ajay Banga, Marc Rowan, asin US national security adviser Robert Gabriel mantang si Trump an masirbing chairman kan lupon.
Pigdesignar man an dating UN Middle East envoy na si Nickolay Mladenov bilang representante kan board sa mismong Gaza
An nasabing lupon an parte kan 20-point peace plan ni Trump.
Afuera digdi, sarong International Stabilization Force an gigibuhon, na pangengenotan ni US Major General Jasper Jeffers, nganing suportaran an seguridad asin sanayon an Palestinian police.
Kasabay kaini, itutugdok an suway na National Committee for the Administration of Gaza, sarong 15-member Palestinian technocratic body na papangenotan ni Ali Shaath, nganing mamahala sa uru-aldaw na mga operasyon sa teritoryo.
Magigirumduman na an US peace plan pig-implementar kan Oktubre kan nakaaging taon asin yaon na ngonyan sa ikaduwang yugto kaini, na nakasentro sa rekonstruksyon asin demilitarisasyon kan Gaza, kabali an pagdis-arma kan Hamas.
Alagad, nagtetenir na marupok an kasunduan huli ta may nairerehistro pa mang kadahasan, asin base sa United Nations, nagtetenir na malala an kamugtakan kan labi 2.1 milyong Palestino sa Gaza.
