LEGAZPI CITY-Nakaresibe nin duwang magkasunod na mga pag-atraso sa korte administrasyon ni US President Donald Trump mapadapit sa imigrasyon pagkatapos na an sarong federal judge ulangan an propwestong limitasyon sa mga visa asin labing 20 estado laban sa bagong amenda sa pagkuha kan residency status.
Temporamenteng pinaralisa ni US District Judge F. Dennis Saylor IV sa Boston an propwesto kan Department of Homeland Security (DHS) na magpapataw nin fixed time limits sa pagmamantenir kan mga dayuhang estudyante asin mamamahayag sa US nin warang extension.
Lilimitahan sana sa apat na taon an F asin J visas para sa mga estudyante asin exchange program participants, asin 240 aldaw naman sa I visas kan foreign journalists, alagad ilinadawan kan hukom na maluya an katuwiran kan DHS asin nagreresulta suboot ini sa dakulang danyos sa ekonomiya asin sektor nin edukasyon kan nacion.
Sa sarong separadong legal hidwaan, duwang demanda man an isinangat sa Manhattan federal court kan koalisyon kan 22 estado sa pangengenot kan New York, California, asin Illinois, kaiba an anom na ciudad.
Obheto kaini na ulangon an regulasyon na magpapahiwas sa pamantayan kan public charge, kun saen posibleng o ideklara bilang “inadmissible” sa pagkua kan green card an mga imigranteng naggagamit nin mga legal na tabang pampubliko.
Kinondena man kan lokal na opisyal, arog ni New York City Mayor Zohran Mamdani, an propwestong ini asin sinabing ipigbubusol kaini an mga pamilyang imigrante na magrayo sa mga pampublikong programang nagtatabang sa saindang salud asin pagkakan.
