LEGAZPI CITY — Maswerteng warang nakulugan sa nangyaring harassment incident kan mga pigtutubudang rebeldeng grupo sa tropa kan Camalig Municipal Police sa Barangay Maninila sa nasabing banwaan kan Albay.
Sa intrevista kan Bombo Radyo Legazpi ki Pol. S/Insp. Kenny Tantiado, hepe kan Camalig PNP, nangyari an insidente mantang pauli na an tropa hale sa barangay visitation asin PCR activities sa mga barangay kan Taloto asin Mabunga.
Istorya kan hepe na mantang pauli na, nagkaigwa nin duwang pagsabog asin pinaputukan pa kan mga rebeldeng grupo kan New People’s Army (NPA) sa may Barangay Maninila.
Nagdurar man nin duwang minuto an ribayan kan mga putok.
Wara man na nairido sa lado kan gobierno mantang dae pa makumpirmar sa lado kan mga rebelde.
Sa ngonian, padagos an paghahanap kan mga pulis sa mga nakahampang na rebeldeng grupo.
