Nangapodan si dating Senador Antonio Trillanes IV nin masusing imbestigasyon katakod kan suboot P51 bilyong flood control insertions ni Davao City Rep. Paolo Duterte, na kinumpirma suboot ni dating Department of Public Works and Highways (DPWH) Undersecretary Maria Catalina Cabral.
Inengganyar ni Trillanes an Independent Commission for Infrastructure (ICI), DPWH, asin Office of the Ombudsman na bistohon asin siyasaton an nasabing insertion.
Iminungkahi ni Trillanes an pirang lakdang sa imbestigasyon, kabale an pagkua nin gabos kan kontrata puon 2019 sagkod 2022, beripikasyon gikan sa sa Department of Budget and Management asin Commission on Audit kun nabayadan an mga proyekto, asin pagpapaapod sa mga contractor na imbuelto.
Dugang pa niya dapat man na magsagibo nin aktuwal na inspeksyon sa mga proyekto sa Davao City nganing mabisto an eksaktong lokasyon, asin kun ini an ghost project o substandard. Pig-engganyar man niya an pagsunad nin magkakanigong kaso.
