LEGAZPI CITY—Timbog an sarong street-level individual na lalaki sa ikinundusir na buy-bust operation kan mga otoridad sa banwaan kan Libon, Albay.
Nadakop sa aktong nagpapabakal nin sarong pakete kan pigtutubudang shabu an sarong 43-anyos na tricycle driver sa sarong poseur-buyer kan kapulisan.
Nakumpiskar digdi an sarong heat-sealed transparent plastic sachet na may laog nin pigtutubudang shabu, na may gabat na 0.15 gramo asin street value na P1,020 karibay kan buy-bust money.
Afuera digdi, nakua man sa suspek an saro pang heat-sealed transparent plastic sachet na may laog nin pigtutubudang shabu, na may gabat na 0.16 gramo asin street value na P1,088; sarong transparent plastic sachet na may laog nin 3 nakarolyong aluminum foil strip, sarong yellow lighter, duwang hiringilya, apat na bala kan caliber .40, sarong brown leather wallet na may laog nin manlaen-laeng IDs asin P1,830 na may manlaen-laeng denominasyon.
Nag-abot sa 0.31 gramo nin pigtutubudang shabu na may street value na P2,108 an nakua gikan sa suspek.
Naarestar an suspek sa pinagsarong operatiba kan Libon Municipal Police Station, Albay Police Provincial Office Provincial Intelligence Unit, asin Philippine Drug Enforcement Agency Regional Office 5.
Mientrastanto, presenteng nakakarsel sa custodial facility kan Libon MPS an suspek asin mahahampang sa kasong pagbalgar sa Republic Act 9165 o Comprehensive Dangerous Drugs Act of 2002.
