LEGAZPI CITY- Binawian na nin buhay an drayber kan tricycle na nabangga kan tren sa Brgy. Tuburan, syudad kan Ligao.
Katakod ini kan nairehistrong aksidente sa riles sa liwat na pagbyahe kan tren na Naga-Legazpi-Naga.
Binisto an nasambitan na biktima na si Omar Martinez, 44-anyos mantang napag-araman na lunad man kaini an aki na si Bomerlito na presenteng nagpaparahay sa Bicol Regional Training and Teaching Hospital (BRTTH.)
Sa pahayag kan mga testigo, nagluluwas na bigla na sanang nagbutwa sa may riles an nasambitan na tricycle asin nagpwersang magbalyo kun sain na-stock pa ini sa parte kan riles asin dae tulos na nakahali kasabay kan pag-abot kan tren.
Sa kusog kan impact kan pagkabangga sa tren, nagbaliktad an tricylce na rason kan pagkabadol kan payo kan drayber na nagibo pang maidalagan sa ospital siring man an lunad na pasahero.
Mientrastanto, ikinamundo man kan Philippine National Railways (PNR) an trahedyang resulta kan dapat kutang magayon na pagbubukas kan byahe.
Ipighayag ni Engr. Jose Florece, division manager kan Naga-Albay Area ng PNR na preparado sindang magtao nin financial assistance sa pamilya kan biktima alagad nakadepende man giraray sa magigin resulta kan imbestigasyon.
Napag-araman na dae nin nakabantay na crossing keeper kan mangyari an aksidente kun kaya urog na magigin strikto na suboot an ahensya dapit digdi.
Abiso man kaini sa publiko na magin alerto asin magsunod sa basic rule na ‘Stop, Look and Listen’ sa kada pagbalyo.
