LEGAZPI CITY — Binadil kan dae pa maaramang bilang nin mga suspek an sarong tricycle driver na nagkakaturog kan saiyang behikulo sa banwaan kan Matnog, Sorsogon.
Segun ki Sr. Insp. Ma. Luisa Calubaquib, tagapagtaram kan Police Regional Office in Bicol (PRO5), nagkakaturog sa laog kan saiyang tricycle si Vicente G. Gaton, 54 anyos mantang naka-park sa waiting area sa kalabaan kan Barangay Camcaman, Matnog kan biglang may puminundong van asin buminababa an mga suspek asin pinagbabadil an biktima.
Tulos na nagadan si Gaton huli sa sinapar na tama sa manlaen-laeng parte kan hawak mantang nagdulag an mga suspek lunad kan getaway vehicle.
Narekober man kan scene of crime operatives sa pinangyarihan kan insidente an 13 empty shells hale sa dae pa maaramang kalibre nin badil.
Segun ki Calubaquib, nagpapadagos pa an imbestigasyon kan Matnog Municipal Police Office ngane madetermina kun mga rebeldeng New People’s Army an nasa likod kan pang-aatake.
