LEGAZPI CITY – Nahahadit an Commission on Human Rights (CHR) Bicol na magamit sa publicity an pig-aandamang pagluluwas kan panibagong listahan kan mga pulitikong pigsasabing imbwelto sa transaksyon kan iligal na droga o “narco-list”.
Segun ki CHR Bicol Director Atty. Arlene Alangco sa intrevista kan Bombo Radyo Legazpi mas maray man giraray na maihayag an pugol na impormasyon kan Department of Interior and Local Government (DILG) sa proper forum o sa korte.
Digdi matatawanan suboot nin oportunidad an pig-aakusaran na makapag-eksplikar asin madepensaran an sadiri sa mga kinakahampang na reklamo.
Dugang pa ni Alangco, ipipresentar man an mga ebidensya kan maginibong na lado tangarig na mahiling an kakusgan kan nakomiter na bayolasyon.
Posible man kaya suboot na magamit an nasabing listahan tangarig na madanyaran an reputasyon kan persona asin mismong pamilya kaini na dificil nang maibalik urog na kun maprobarang wara man katotoohan an ipigbuyagyag na mga detalye.
Mientras tanto, bukas man an CHR sa pagtabang kun igwang magdulok sa ahensya alagad dapat na nakapalaog man sa saindang mandato.
