LEGAZPI CITY- Nakalinyada an dakol na mga aktibidad para sa Palarong Bicol 2017.
Sa Enero 27 mapuon nang mag-arabutan sa syudad kan Legazpi an mga delegado gikan sa manlaen-laen na dibisyon.
Pebrero 3 na pormal na bubukasan an event na pupuunan sa paagi kan sarong solidarity fun run sa Velamor Subdivision hasta sa Legazpi Boulevard.
Saro sa mga obheto kan Palarong Bicol an pagpapabaskog kan Clean and Green Program kun kaya magkakaigwa man nin tree planting activity sa parehong petsa sa Brgy. Lamba asin Puro.
Alagad tatawanan nin seedlings an gabos na delegado ngani na magtanom sa kanya-kanyang billeting areas na parte kan nasambitan na obheto.
Sarabay-sabay ining gigibuhon maski an mayor na tree planting site iyo an nasambitan na mga barangay sa syudad.
Mientrastanto, sigon ki Schools Division Superintendent Cecile Rivera, isasagibo an awarding sa mga manggagana sa mismo nang playing events alagad sa Pebrero 7 nakatalaan an closing ceremony kun sain magkakaigwa man giraray nin awarding para sa over-all ranking asin champion.
Piglalaoman na maabot sa syudad an poco mas o menos 5,000 na delegado na mapatiribayan sa manlaen-laen na kawat ngani na mag-qualify sa Palarong Pambansa 2017.
