LEGAZPI CITY – Ipigdoon kan Land Transportation Franchising and Regulatory Board na padiit-diit nang nagdadakula an Transport Network Vehicle Service (TNVS) sa rehiyon Bicol.
Ini an kasunod kan saindang paglansar kan InDrive na ika-tulong Transport Network Vehicle Service (TNVS) operator sa rehiyon.
Segun ki Land Transportation Franchising and Regulatory Board Bicol Director Joel Defeo sa intrevista kan Bombo Radyo Legazpi na sa mga masunod na mga panahon an igwa na nin mga TNVS na may rutang Legazpi-Naga asin Legazpi-Sorsogon.
Importante suboot na mag-agi an mga ini sa proseso asin accreditation sa saindang ofisina nganing matawan nin kompyansa an mga commuter na matatawan sinda nin salbado asin matuninong na byahe.
Namomonitor man ninda an mga pamasaheng pigsisingil kan mga TNVS Drivers sa saindang mga pasahero nganing malikayan an overcharging.
Pigtaram pa kan opisyal na nasa commuter na suboot an desisyon kun mawot nindang magsakay sa Traditional Jeepney, Modernized Jeep, Bus, TNVS, asin iba pa.
Padagos man an saindang pagkoordinar sa mga lokal na gobierno para sa paglalatag kan Local Public Transport Route Plan nganing makagibo an mga ini nin mga polisiya sa saindang mga kakasaldahan.
Pagirumdom ni Defeo sa publiko na permihang bukas an saindang ofisina nganing magdangog sa saindang sumbong, suhestyon, asin agrangay nganing matawan an mga ini nin maray na public transport system sa rehiyon.
