LEGAZPI CITY-Nagkapirang grupo nin mga drayber asin operator an nangangapudan nin dagdag sa pamasahe nin sagkod sa P2.
Nagpatanid man sinda na magsasagibo nin nationwide transport strike kun dae masimbagan an saindang mga kahagadan.
Segun ki Manibela chairperson Mar Valbuena, kulang an P1 na dagdag sa pamasahe huli ta dae pa nakakabawi an nawarang ingreso kan mga driver asin operator poon pa kan Marso.
Mientrastanto, sinabi ni ACTO president Libay de Luna na dakulang tabang an P1 o P2 na paglangkaw kan pamasahe sa mga trabahador sa sektor kan transportasyon, orog na huli sa padagos na paglangkaw kan mga gastos.
Sinabi man kan duwang grupo na magsasagibo sinda nin roadblock kun padagos na maglangkaw an presyo kan mga produktong petrolyo.
Segun ki Valbuena, pig-aadalan na ninda an petsa kan posibleng transport strike asin pigkakarkulong maabot sa 100,000 na mga drivers asin operators sa bilog na nacion an posibleng mapartisipar.
Nakatalaan man na makipag-olay an grupo sa Land Transportation Franchising and Regulatory Board para sa saindang kahagadan na dagdagan an pamasahe.
