LEGAZPI CITY – Sasabayan nin mga hiro protesta kan nagkapirang sektor kan pampublikong transportasyon an implementasyon kan big time oil price hike sa Martes, Oktubre 11.
Sa intrevista kan Bombo Radyo Legazpi ki PISTON National President Mody Floranda, mismong sa hampang kan mga kumpanya kan produktong petrolyo magsasagibo nin hiro protesta.
Ini an ngani na kondenaron an panibagong ipapaotob na oil price hike.
Segun ki Floranda, bako makatarungan an nasabing panibagong paglangkaw sa presyo kan mga produktong petrolyo lalo pang sadit man sanang porsyento an mga ipigpaotob na oil price rollback.
Sinabi kaini na kapag dae naaksyunan an palabaw na presyo kan produktong petrolyo padagos na mabulusok an kabuhayan asin pagbuhay-buhay kan mga pobreng Pilipino.
Kun kaya nangangapudan sa manlain-lain na grupo kan sektor kan transportasyon sa nacion na makisumaro sa paglunsar nin hiro protesta sa mga kumpanya kan petrolyo ngani na kondenaron an taas-baba na presyo kan krudo.
