LEGAZPI CITY – Dae na ipigkangalas kan sarong transport group sa provincia kan Sorsogon an nagdadangadang na naman na pagtaas liwat sa presyo kan produktong petrolyo sa masunod na semana.
Segun ki Sorsogon Integrated Transport Federation (SORINTRAFED) President Ramon Dealca sa intrevista kan Bombo Radyo Legazpi na permihang nakahanda an mga drivers asin operator huli ta haros pirang semana nang nagkakaigwa nin oil price hike.
Kahagadan ninda ngonian na matabangan sinda kan gobierno sa paagi kan fuel subsidy nganing dae na sinda magbutas kan saindang mga sadiring kwarta sa paggasolina asin nganing makadugang pa maski papano sa saindang panggastos ngonian na kapaskuhan.
Huli man suboot sa padagos na paghalangkaw sa presyo kan mga produktong petrolyo an haros wara na man nin patod an pagbawas kan saindang aldawang ganansya nagiging agrangay na kan saindang sektor.
Pigkakahandal man kan opisyal na enkaso magpadagos an oil price hike an mapapagalan an saindang mga driver asin operator na makakuwa nin ganansya asin pwedesir na mawaran nin pamasko sa saindang mga pamilya.
Nagmamawot si Dealca na tabangan sinda kan gobierno nganing maibsan an saindang kadifisilan huli sa padagos na pagtaas kan presyo kan produktong petrolyo na labing nakaka-apektar sa saindang sektor.
