LEGAZPI CITY – Mahigot na pigkondena kan grupo nin mga tsuper an duwang beses sa sarong semanang pagtaas kan presyo kan gasolina sa enterong nacion
Segun ki Pagkakaisa ng mga Samahan ng Tsuper at Operator Nationwide (PISTON) President Mody Floranda sa intrevista kan Bombo Radyo Legazpi maski pigbanga ngonian na aldaw kan mga oil companies asin kan gobierno an pagtaas alagad maabot man giraray ini nin 5 pesos kun susumahon huli ta dakulang kantidad na an mawawarang ganansya kan mga driver asin operator na pwedesir na kuta magamit sa gastuson kan saindang pamilya.
Sa pagkakarkulo man ninda an maabot sa 600 pesos an mababawas sa ganansya kan driver kada aldaw huli sa nasabing pagtaas.
May mga nanotaran man sindang mga gasolinahan na nagsarado ngonian na aldaw alagad nagtutubod siya na saro ini sa mga taktika kan mga oil companies nganing magdakula man an saindang ganansya.
Hinala man kaini na pwedesir na hoarding an piggigibo kan nagkapirang kampanya huli sa biglaang pagsasarado kan mga ini huli sa suboot pagtaas kan presyo.
Pigtawan doon man niya na magpapadagos an serye kan saindang mga hiro protesta sagkod sa State of the Nation Address ni Presidente Ferdinand Marcos Jr.
Isasagibo ninda ini nganing kalampagon an administrasyon nganing matawan nin sulusyon an padagos na pagtaas kan presyo kan produktong petrolyo.
Pigkakahandalan man ni Floranda na pwedesir mapiritan an mga driver na magpundo na muna sa pagpapasada huli sa halangkaw na presyo kan produktong petrolyo.
