LEGAZPI CITY- Pig-aagrangay ngunyan kan sarong transport group an dakulang kawaran sa saindang ganansya urualdaw.
Ini an sa tahaw man liwat na padagos na paglangkaw kan presyo kan produktong petrolyo na ipinagbabasol sa tensyon sa Middle East.
Segun ki Basta Driver Safety Enforcer Chairman Ronel Nebres sa intrevista kan Bombo Radyo Legazpi na nasa P250 hasta P300 an nababawas sa saindang aldawan na ganansya huli sa gastos sa petrolyo.
Aminado ini na dakulang kawaran na para sa mga drivers asin operators an nasabing kantidad.
Huli digdi, nangapudan an grupo sa gobierno na matawan sinda nin fuel subsidy ngani na maibsan an gabat kan problema sa presyo kan langis.
Dugang pa ni Nebres na dapat na siertuhon na gabos na drivers an matatawan nin ayuda asin bako pirang indibidwal sana huli ta anas man apektado kan halangkaw na presyuhan kan produktong petrolyo.
