LEGAZPI CITY – Dismayado pa hasta sa ngunyan an saro sa kagawad kan Barangay Baranghawon sa syudad nin Tabaco huli sa epekto kan pagkawara kan pondo na nagkakantidad nin haros P2.4 milyon.
Segun ki Kagawad Jennifer Bragais, kanselado pa hasta sa ngunyan an enterong transaksyon sa saindang lugar maging an mga sweldo kan opisyales, barangay health workers asin tanod an pirang bulan ng dae pa naitatao.
Dae man suboot sinda makapagkondusir asin makapagtao nin serbisyong pampubliko huli sa kawaran nin pondo.
Segun sa opisyal, tutukaron an nasabing isyu sa ikokondusir na barangay assembly sa Marso 25 kun saen si Kapitan Rene Realisan mismo an mapaaram kan impormasyon sa mga constituentes kaini.
