LEGAZPI CITY—Nakatalaang magkundusir nin training sa paggibo nin iba pang produkto gamit an sirang lawlaw o tamban para sa mga agom kan mga parasisira an lokal na gobierno kan banwaan kan Bulan, Sorsogon.
Magigiromdoman na pigtatapok na sana kan nagkapirang parasisira an saindang dakop na tamban o may local term na lawlaw huli ta dae man naipabakal ini kan nakaaging Semana Santa.
Napag-araman na dae nakapag-operate an sarong ice plant na yaon sa lugar huli ta nasa bakasyon personahes kaini na sinabayan pa kan pagtitipid sa kuryente na nagpaluya kan produksyon.
Segun ki Bulan Municipal Councilor Recto Valeriano, sa intrevista kan Bombo Radyo Legazpi, iti-train an mga nasabing indibidwal kan mga personahes gikan sa Bicol University siring kan paggibo nin patis gamit an sirang lawlaw.
An nasabing lakdang an kadugangang kabuhayan para sa mga parasisira sa nasambitang banwaan.
Mientrastanto, pig-asigurar man kan opisyal na piggigibo ninda an gabos nganing maibarewas an magkakanigong tabang para sa mga parasisira.
