LEGAZPI CITY- Plantsado na an binilog na traffic plan kan Legazpi PNP para sa seguridad sa grand opening kan Palarong Bicol 2017 sa aga.
Katakod kaini, magsasagibo nin traffic rerouting asin nagkapirang tinampo an isasarado ngani na magtaong dalan sa parada kan mga delegado.
Piglalaoman na poco mas o menos 8,000 an mapartisipar sa parada.
Sa intribista ki PSUPT Nilo Berdin, hepe kan nasambitan na pulisya, isasarado para sa mga pampubliko asin pribadong behikulo an tinampo kan Rizal St. puon sa may Shell Station hasta sa may BRTTH antes mag-Bantang road.
Eksaktong alas 12:00 nin udto gigibuhon an traffic rerouting kun sain gagamiton na ruta kan mga behikulo an Airport Road, Gogon, Cruzada asin Bogtong.
Sigon ki Berdin, ididistribuir ninda an mga behikulo sa mga espesipikong ruta ngani na magin matanos an byahe kan mga ini.
Baad suboot abuton na nin alas 5:00 nin hapon antes na liwat na bukasan an nasambitan na tinampo.
Para man sa parada, sinabi kan hepe na nagpreparar sinda nin placard ngani na dae malibong an mga delegado.
Nakadisignar na man suboot an nasa 600 na security personnel sa mga billeting centers asin playing venues kun sain nakipagkoordinar na man an Pwersa Armadas kan Pilipinas para sa checkpoint.
Mientrastanto, nagpatanid si Berdin sa mga partisipantes kan sporting event na tulos na magsumbong sa kapulisan kun in kaso igwa nin manotaran na over-pricing sa mga tricycle drivers sa syudad.
Abiso pa kaini sa mismong mga drayber, sususugon ninda an pangaran kan mga ini asin sisiertuhon na masasangatan nin magkakanigong penalidad.
