LEGAZPI CITY — Dakula na an nagin pagbabago sa problema sa gubot kan trapiko sa syudad kan Tabaco.
Ini an pahayag sa Bombo Radyo Legazpi ni Tabaco City Mayor Krisel Lagman-Luistro katakod kan mga impormasyon na suboot paglala sa nasambitan na problema huli sa mga padyak.
Sinabi ni Mayor Luistro na bako totoong nagdakula pa an saindang problema sa traffic congestion huli ta sa katunayan, dakol na suboot an nagsurindir kan saindang mga padyak asin nahalian nin prangkisa huli na man sa pagpalyar na makabayad susog sa ordinansa na ipigpapautob sa lugar.
Sigon sa alkalde, nagkaigwa nin resolusyon an Sangguniang Panglungsod kan Tabaco kun sain nilimitahan na sana sa 2,600 na unit an mga padyak.
Alagad sa ngunyan, sinabi kan opisyal na dae pa ngani nag-aabot sa 2,000 an mga rehistrado kan nasambitan na behikulo.
Inako man kaini na igwang mga colorum kun kaya pinakusog pa ninda an enforcement activities ngani an madakop an mga ini.
Dugang pa ni Luistro, ngani na maresolbaran an saindang problema sa trapiko, nag-arkila an syudad nin walong paradahan ngani na maibitaran an pagparada kan mga behikulo sa sentro.
Mientrastanto, inomaw kan alkalde an hepe kan Tabaco City Police na si PSupt. Vincent Camero huli ta puon suboot kan magtukaw ini, mas nareyalisar pa an traffic enforcement na nakatabang na marhay sa pagpapatanos kan bulos kan trapiko sa syudad na binansagang Padyak Capital of the Philippines.
