LEGAZPI CITY- Nangapudan an sarong grupo na magtarabangan an mga nanggana asin nadaog na kandidato na magkaigwa nin inisyatiba na baklason na an saindang mga campaign materials.
Segun ki Ban Toxics Campaigner Thony Dizon sa intrevista kan Bombo Radyo Legazpi na hasta sa ngunyan, padagos man liwat na nakakabit an mga tarpaulin asin campaign paraphernalia.
Marurumduman na tinawan kan Commission on Elections an mga nagdalagan sa nakalihis na pirilian nin limang aldaw ngani na gibuhon an saindang mga obligasyon sa ikinabit na mga materyales durante kan panahon nin pangangampanya.
Aminado an opisyal na dakulang epekto kun direktang itatapok an nasabing mga basura huli ta makakadugang na naman ini sa volume kan mga basura sa nacion.
Huli digdi, sinabi ni Dizon na mas marhay na i-reuse o iresiklo an nasabing mga tarpaulin ngani na dae na makadugang sa mga basurang nakakarot sa kapalibutan.
Alagad nagpagirumdom an grupo na dae paggamiton an nasabing mga campaign paraphernalia sa mga gagamiton kan mga kaakian huli ta posibleng igwa ining peligrosong mga kemikal.
