LEGAZPI CITY—Nagpagiromdom an grupong BAN Toxics sa mga mabakal nin mga school supplies urog na ngunyan na nagdadangadang na opening kan School Year 2025-2026 sa June 16 na magin maingat sa pagpili nin mga school supplies huli sa posibleng peligro kan toxic substances sa salud kan mga kaakian.
Segun ki BAN Toxics Campaigner Thony Dizon, sa intrevista kan Bombo Radyo Legazpi, na afuera sa presyuhan kan mga nasambitang gamit, dapat man na kilatoson nin maray an mga produkto siring kan paghanap sa product label kan mga ini.
Maaaraman kaya sa nasabing product label kun lehitimo an sarong item na mababakal asin may impormasyon o giya na magagamit kan mga magurang.
Dugang pa ni Dizon na dapat magin maingat man en kaso may maparong na kakaiba sa mga school supplies na gibo sa plastic huli ta posible ining may nakakahudong na kemikal na delikado para sa mga kaakian.
Basado man sa saindang pagsusuri na an may mga matitingkad na kolor an komun na naoobserbaran na may nakakahudong na kemikal.
Mientrastanto, suhestiyon man kaini na dapat mas magin visible na an mga regulatory agencies siring kan Department of Trade and Industry (DTI) asin Food and Drug Administration (FDA) sa mga tiendahan nin school supplies nganing maaraman kun lehitimo an mga naunambitang pigpapabakal na kagamitan.
