LEGAZPI CITY-Nagpatanid an sarong toxic watchdog group sa Food and Drug Administration (FDA) laban sa mga ipinagbabawal na produktong pampaputi sa nacion.
Ini makalihis an saindang market monitoring partikular sa Mindanao kun sain nanotaran an mga ipinagbabawal na mga mercury-containing skin lightening na produkto.
Segun kay Ban Toxics Campaigner Thony Dizon, sa inrevista kan Bombo Radyo Legazpi na padagos an saindang market monitoring sa mga ipinagbabawal na cosmetic product kaiba an mga skin whitening cream.
Dagdag pa kan opisyal na sa saindang pagbisita sa ciudad kan Surigao, Butuan, asin Davao, ikinahandal ninda na mas naglalakop an mga ini hale pa sa Metro Manila pasiring sa mga ciudad.
Mantang padagos na pinagbabawal an mga ini poon pa 2017 asin igwang reiterated health advisory an FDA, alagad padagos na pigpapabakal ini.
Tinawan doon ni Dizon na obheto ninda na patanidan an publiko asin mangapudan sa gobieno na pahigoton pa an enforcement action ngani mapugulan an pagpapalakop asin bentahan kan ipinagbabawal na pampaputing produkto.
Kairiba sa pinagbabawal na pampaputing produkto an ‘Pakistan white base’, mga ‘Goree Product’, arog kan Goree beauty cram asin Goree Gold.
Siring man an S88 underarm white cream na kun sain inabisuhan na kan FDA huli ta nakakahandal ini na karaniwang pigpapabakal sa mga ciudad.
Pagirumdom kan opisyal an kaipuhan nang mapugulan, makumpiskar, asin mapanimbag an mga naga-angkat kan mga produktong ini na padagos na pinagpapabakal bako sana sa Metro Manila, magin sa bilog na nacion.
