LEGAZPI CITY — Ipig-orgulyo kan Department of Tourism na padagos an paglangkaw kan tourist arrival sa rehiyon na dakulang tabang sa ekonomiya.
Segun ki Fe Buela, hali sa 4.5 million na turista kan nakalihis na 2015, nagkaigwa nin haros 19% increase an turismo o katumbas nin 5.4 million na mga foreign asin domestic tourists kan taon 2016.
An nasambitan na datos suboot an nagigin inspirasyon kan ahensya ngani na dagos pang pagayunon an manlaen laen na destinasyon sa rehiyon.
Dugang pa kan opisyal na dakulang bagay man an nagigibo kan foreign currency earnings na nakukua kan gobyerno.
Mientras tanto, inengganyar ni Buela an mga investors na magpasiring sa Bicol Region huli ta nagdadakula man suboot an demand para sa tourism related facilities para sa mga naglalaog na bisita.
Sa ngunyan dakulang oportunidad man suboot na nagigin alternative destination an Bicol huli sa nangyayaring kariribukan sa Mindanao.
