LEGAZPI CITY — Dae pa makatubod hasta sa ngunyan an topnotcher sa April 2017 Midwife Licensure Examination sa trayumpo na naabot makalihis mangenot sa labi 2,000 examinees asin makua an exam rating na 91.45%.
Sa ekslusibong intrevista kan Bombo Radyo Legazpi kay Kathryn Avery Aldave kan Catanduanes, iniheras kaini an mga inagihang eksperyensya antes pa man maabot an inapod kaining ‘biyaya’.
Segun digdi, pano suboot nin presyur sa pagre-review pa sana na sinabayan pa kan pagkabulag sa pamilya urog na sa Legazpi City ini nag-review kaya makapirang beses namang naghibi alagda nagpadagos man liwat sa saiyang mawot sa buhay.
Sa urualdaw na pangadyi, solamenteng hagad sana suboot kaini an makapasar kaiba an bilog na klase kaya nakigkig ini kan maipaluwas na an resulta.
Inspirasyon ni Kathryn sa trayumpo an pamilya kun saen matua ini sa tulong magturugang mantang sarong registered nurse an ina alagad nagpundo sa pagtatrabaho kan magkahelang asin nagkua man nin kursong Nursing an ama.
Sa ngunyan, ipapadagos ni Kathryn an pag-aadal sa Catanduanes State University sa Virac hasta sa opisyal na kaining maabot an pangaturugan na maging sarong registered nurse.
Padagos man an pagbati digdi urog na sa mga social media sites kun saen tinapatan man ini ni Kathryn nin mainit na pasasalamat kasabay kan pag-orgulyo sa lahing Bikolnon makalihis na dominahon kan mga Bicolano an Top 10 spots.
