LEGAZPI CITY – Dae makapanubod si Cloudine Cardel Arienda na nakuwa niya an top 4 sa mga listahan kan mga topnotchers sa kakatapos pa sanang September 2025 Social Work Licensure Examination.
Segun saiya sa intrevista kan Bombo Radyo Legazpi na bago pa man siya pumasa sa nasabing eksaminasyon an kadakol na kadifisilan an saiyang nakahampang partikulamente na an pagreview.
Paghistorya niya man na pinili niya an kursong Social Work nganing makatabang sa ibang tawo huli ta magayon sa saiyang pangmati na nakakatabang sa mga tawo urog na sa mga kliyente niya sa saiyang lalaugan na trabaho.
Sa ibong kan mga rekisitos an kinaipuhan sa saiyang pag-aadal asin kapagalan an dae ini nagin rason nganing tapuson an kurso na saiyang tinahak asin mag-take nin Licensure Examination.
Pigtaram pa kaini na kan oras kan eksaminasyon an aminado siyang nadifisilan asin naghuna na dae siya makakapasar alagad saro sa mga ginibo niyang estrahiya an saiyang mga pangaturugan na magin lisensyadong Social Worker asin pagpapasa-diyos kan iba niyang simbag.
Nagsirbi man na inspirasyon niya sa trayumpo an saiyang pamilya na nagtaong kusog saiya asin nagbusol nganing maghingoa sa propesyon na saiyang pinili asin sa pagsuporta sa paglaog niya sa review center.
Pagirumdom niya sa man sa mga nagmamawot na magin lisensyadong social worker na manalig sa diyos asin magtubod sa sadiring kapasidad na magigin totoo an saindong pangaturugan.
