LEGAZPI CITY—Arestado an Top 3 most wanted na lalaki na may kasong panlulugos asin acts of lasciviousness sa kinundusir na operasyon kan mga kapulisan sa banwaan kan Rapu-Rapu, Albay.
Segun ki Rapu-Rapu Municipal Police Station Police Corporal Richard Madara, sa intrevista kan Bombo Radyo Legazpi, binisto an suspek na si alyas “Ghorge”, 40-anyos, may agom, sarong laborer, asin residente kan Barangay Liguan, kan nasambitang banwaan.
Naarestar an suspek sa bisa kan mandamiento de aresto sa kasong panlulugos na inisyu kan Regional Trial Court Branch 1, Rawis, Legazpi City, na may petsang Abril 30, 2025.
Dugang pa kan opisyal na pwedesir na makapagpiyansa an suspek nin P200,000 sa kaso kaining acts of lasciviousness.
Alagad an kasong panlulugos kaini na may 28 counts an wara na pigrekomendang piyansa.
Sa presente, an suspek nasa kustodiya na kan Rapu-Rapu Municipal Police Station.
Mientrastanto, abiso man ni Madara sa mga biktima nin panlulugos na tulos na makipagkoordinar sa mga otoridad nganing tulos man ninda ining maaksyunan.
