LEGAZPI CITY- “Blessed” asin dae pa makapanubod hasta sa ngonian sa naresibeng trayumpo an Top 2 kan katatapos pa sanang November 2018 Civil Engineering Board Examination sa rating na 96.50%.
Ipigheras ni Norejun Osial, 22-anyos asin tubong Pioduran, Albay sa ekslusibong intrevista kan Bombo Radyo Legazpi na haros mapahibi asin magkurahaw siya sa piglulunadang bus haling Manila kan maaraman an resulta.
Nagbunga suboot an anom na bulan na pagreview para sa eksaminasyon kan Bicol University graduate kun kaya magin an ina na paratukdo asin amang paraoma an naghihibi hasta ngonian sa magayon na bareta.
Si Osial an ikatulo sa apat na magturugang mantang consistent honor student puon elementarya na nunca pang nabagsak sa anuman na subject urog na sa Matematika.
Mientras tanto, mas pipilion man giraray suboot ni Osial na magtrabaho sa Pilipinas dawa pa igwang mag-ofrecir na mangibang-nacion ini kasabay kan pagtataong-duon na mawot magtao nin importanteng kontribusyon.
Sa presente, plano ni Osial na magbalik giraray sa Manila tangarig na magtukdo sa hinaleang review center asin makua nin Master’s Degree sa Structural Engineering makalihis an tulong taon.
Sa ibong na lado, matrayumpong nakapasar an nasa 6,262 sa maabot sa 14, 000 na examinees sa bilog na nacion.
